DILI, 20 MAIU 2024

Prezidenti Aportil IP, Sr. José de Oliveira Leong Partisipa Seremónia Isar  Bandeira Nasional Komemorasaun Loron Restaurasaun Independénsia Timor-Leste ba Dala-XXII, iha  Palásiu Prezidenti Nicolau Lobato, Bairru-Pité.

Estadu Komemora Loron Restaurasaun Independénsia 20 Maiu tinan ne’e ho tema sentral “Hametin Instituisaun Estadu Hodi Servi Povu"

Iha seremónia ida ne’e marka prezensa husi bainaka importante Sua Majestade Sultan Haji Hassanal Bolkiah Mu'izzaddin Waddaulah Sultan Yang Di-Pertuan Brunei Darussalam,  no hetan mós kondekorasaun hosi Prezidenti Repúblika Demokrátika Timor-Leste, Dr. José Ramos Horta ho Medalha Grande Colar  Ordem de Timor-Leste.

Iha ámbitu komemorasaun ne’e, marka prezensa hosi Prezidente Tribunal Rekursu, Deolindo dos Santos , Primeiru Ministru, Kay Rala Xanana Gusmão, Prezidente Parlamentu Nasional, Maria Fernanda Lay, Eis Prezidente Repúblika Taur Matan Ruak ho Fransisco Guteres Lu-Olo Prokurador Jeral Repúblika, Membru Governu no Deputadu, Eis Titular, Reprezentante Sante Sé Iha Timor-Leste, Sua Eminénsia Cardeál Dom Virgilio do Carmo da Silva, SDB, Arsebispu Metropolitanu Dili, Komandante Jeral PNTL, Xefe Estadu Maiór Jenerál F-FDTL, Provedoria ba Direitus Umanus no Justisa,  Embaixadores, Veteranus, Korpu Diplomatiku, Eis Membru Governu no Deputadu, Komunidade, nomós Konvidadus.

𝐃𝐢𝐬𝐤𝐮𝐫𝐬𝐮 𝐏𝐫𝐞𝐳𝐢𝐝𝐞𝐧𝐭𝐞 𝐑𝐞𝐩𝐮́𝐛𝐥𝐢𝐤𝐚 𝐈𝐡𝐚 𝐎𝐤𝐚𝐳𝐢𝐚𝐮𝐧 𝐒𝐞𝐥𝐞𝐛𝐫𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐁𝐚 𝐋𝐨𝐫𝐨𝐧 𝐑𝐞𝐬𝐭𝐚𝐮𝐫𝐚𝐬𝐚𝐮𝐧 𝐈𝐧𝐝𝐞𝐩𝐞𝐧𝐝𝐞́𝐧𝐬𝐢𝐚 𝐍𝐚𝐬𝐢𝐨𝐧𝐚́𝐥 𝐓𝐢𝐦𝐨𝐫-𝐋𝐞𝐬𝐭𝐞 𝐃𝐚-𝐗𝐗𝐈𝐈. 

Ami kontente tebes ita halibur hamutuk hodi selebra Loron Restaurasaun Independénsia Nasionál Timor-Leste nian ba dala XXII.

Iha okaziaun espesiál ida-ne'e, ha'u hato'o ha’u-nia respeitu no benvindu ba ita-nia konvidadu onra nian ne'ebé importante tebes, sua Majestade Sultaun Brunei Darussalam, belun doben ida husi povu Timor-Leste no lider globál ida-ne'ebé di'ak tebes.

Brunei Darussalam sai ona hanesan ezemplu ida ba pás no estabilidade iha mundu ida-ne'ebé nakdoko tebes, mundu ida-ne'ebé iha inserteza no dezafiu barak liu duke serteza, mundu ida-ne'ebé la hanesan ho mundu ne'ebé ita hein bainhira didin Berlin harahun tiha ona iha loron 9 novembru 1989.

Maibé la'ós buat hotu inserteza no laiha esperansa, Brunei Darussalam hanesan fatin ne’ebé dame, ne’ebé hanesan esperansa ba mundu ne’ebé lakon esperansa ida-ne'e, hanesan ezemplu ida kona-ba oinsá Estadu Boot sira no Lider sira bele hetan no kria pás, armonia, hakmatek ba sira-nia povu.

Ha'u hanoin-hikas ha'u-nia vizita ba Brunei Darussalam iha novembru 2023 no ha'u simu ona benvindu ne’ebé estraordináriu husi Sua Majestade, membru sira husi Familia Royal no Governu, no mós husi Povu Brunei.

Sua Majestade Sultan Haji Hassanal Bolkiah, aleinde kaer pozisaun lideransa oin-oin iha nia nasaun ho exelente, sai hanesan ezemplu ida kona-ba lideransa no komprimisu ba pás, toleránsia no fraternidade.

Nia mós nu'udar Xefe Estadu ne’ebé mak seniór no esperiénsia barak liu iha Asosiasaun Nasaun Sudeste Áziatiku (ASEAN), nu'udar Monarku dahuluk ne'ebé fó onra ba ita ho nia prezensa, ho difikuldade no dezafiu sira ne'ebé ita-nia nasaun hasoru atu simu nia.

Ida-ne'e hatudu ninia umildade no karakter simples, lider vizionáriu ida-ne'ebé lidera misaun negosiasaun nian atu hetan independénsia ho dame ba Brunei Darussalam, ne'ebé rezulta Tratadu Amizade no Kooperasaun ho Grande Britania, hodi fó soberania tomak ba Brunei iha tinan 1984.

Timor-Leste no Brunei Darussalam iha prinsípiu hanesan no esforsu hamutuk atu promove ita-nia sidadaun sira-nia moris-di'ak. Nasaun rua ne'e hasoru dezafiu hanesan nu’udar nasaun joven, no hatudu ona reziliénsia no dedikasaun ba dezenvolvimentu umanu no ekonómiku, ho sidadaun sira hanesan sentru.

Ami hakarak kontinua halo tuir modelu dezenvolvimentu sustentavel ida-ne'e, amigavel ba ambiente, ho kualidade servisu públiku ne'ebé aas hodi fornese ba ami-nia sidadaun sira asesu ba servisu báziku sira ne'ebé hanesan sira-nia direitu.

Brunei Darussalam hanesan liña dahuluk ne’ebé lidera dezenvolvimentu umanu ho Indíse 0.823 - klasifikasaun 50 husi nasaun no territóriu 203 no parte husi nasaun ruanulu-resin-rua ne'ebé riku liu iha mundu ho rendimentu médiu kapitál maizumenus dolar amerikanu 31,410.

Ha'u hato'o ha'u-nia agradesimentu kle'an ba Sua Majestade tanba Nia kontinuasaun apoiu ba prosesu adezaun Timor-Leste nian ba ASEAN no ba kompromisu Brunei nian ba ita-nia viajen ba progresu no integrasaun rejionál. Apoiu ida-ne'e sai nu'udar instrumentál iha progresu ne'ebé ita halo ona iha tinan hirak liubá.

Nu'udar ita selebra loron istóriku ida-ne'e, ita renova ita-nia kompromisu atu hametin liután ligasaun entre ita-nia nasaun sira liuhusi promove kooperasaun iha setór oioin, inklui turizmu, infraestrutura bázika, edukasaun, saúde, transporte, indústria (Manufaktura no Estrasaun), agrikultura, peska, floresta, produsaun ai-han no protesaun ambientál. Ita iha kompromisu atu aproveita oportunidade sira ne'ebé oferese husi Ekonómia Verde no Azúl, hodi aliña ita-nia aan ho kompromisu sira ba ASEAN no objetivu sira husi COP28.

Ho espíritu kolaborasaun no amizade nian ida-ne'e, ami hein katak setór privadu Brunei Darussalam nian atu kolabora ho ami-nia setór privadu nasionál kona-ba empreza foun sira ne'ebé bele fó benefísiu ba ita-nia povu no promove dezenvolvimentu sustentavel iha rejiaun laran tomak.

Espera katak vizita Estadu ne'e sei fó-hanoin fali kona-ba saida mak ita bele atinje hamutuk no inspirasaun ba futuru ne'ebé naroman liután ba Timor-Leste no Brunei Darussalam.

Ha'u agradese ba ita hotu ne'ebé mai hamutuk ho ami iha momentu signifikativu ida-ne'e. Hein katak dame no prosperidade sempre hamutuk ho ita.
Maromak sei haraik bénsaun ba ita hotu.