Dili, 24-05-2024
Prezidente APORTIL IP Sr. José de Oliveira Leong akompaña hosi Vogál I Sr. Julio Saldanha Barreto no Vogál II Sr. Leandro de Sena, hamutuk ho Reprejentante JICA Timor-Leste Sr. Keisuke Ujike ho nia ekipa inklui Diretór Jerál Ministériu Transporte no Komunikasaun Sr. Constantino Ferreira Soares lansa rezultadu finál estudu planu mestre ba Projetu ho título “Strategic Port Development Master Plan in Timor-Leste” ho parte interesada sira.
Diskursu:
Ho baze ba akordu entre Japan International Cooperation Agency (JICA) ho Ministériu Transporte no Komunikasaun liuhosi APORTIL IP nu’udar parseiru prinsipál no JICA oferse asisténsia tékniku ba projetu ho título “Strategic Port Development Master Plan in Timor-Leste” durante tinan rua hahú hosi tinan 2022 to’o tinan 2024.
Timor-Leste nu’udar nasaun ne’ebé maioria utilizasaun dalan liuhosi foho no asesu dalan ba munisípiu kuaze iha prosesu subdezenvolvidu tanba ne’e transporte marítima sai nu’udar transporte públiku ne’ebé importante, maibé iha ita-nia portu balun ho kondisaun la favorese no labele utiliza.
Tanba ne’e kriasaun planu estratéjiku dezenvolvimentu portu rejionais tama kategoria urjente no nesesáriu nune’e bele fasilita movimentasaun kargu bo’ot liuhosi marítima hodi atinji planu estratéjiku dezenvolvimentu nasionál.
Planu Mestre Dezenvolvimentu Portu estabelese ho baze legál. Planu ne’e sei sai matadalan ba prosesu administrasaun no jestaun portuáriu nu’udar sentru ho planu prioridade nia durasaun tinan 15 to’o tinan 20 inklui utilizasaun no manutensaun portuáriu no impaktu ambientál ho dezenvolvimentu portuáriu.
Liuhosi planu mestre ba portu ne’e objetivu atenjidu hanesan:
1. Hatúr planu dezenvolvimentu portu nasionál
2. Planu dezenvolvimentu prioritáriu
3. Planu asaun hodi melloria operasaun no manutensaun portuária ba APORTIL.
Objetivu hosi komité koordenasaun konjunta ida-ne’e atu hatene klean kona-ba progresu JICA kona-ba setór portuária iha Timor-Leste no atualiza projeto ekipa estudu ba planu mestre.
Antes termina ha’u hato’o agradese wain ba ita hotu nia atensaun no ha'u nia desju projetu ne'e bele la'o ho susesu ba portu ida-ne'e di'ak liu iha futuru hodi mellora dezenvolvimentu ekonomia Timor-Leste.
